atal berria: Eragile Gida irekia

Gora Egia!-k atal berri bat dauka gaurtik aurrera; Egiako “Eragileen Gida”. Gida honetan mota desberdinetako eragileak biltzea da asmoa, talde eta mugimenduetatik hasita publiko eta pribatuak barne. Ekimenek izaera sozial edo kulturala izatea
lehenetsi dugu, honela besteak beste asanbladak, ikastetxeak, elkarte gastronomikoak, ikuskizun areto eta tabernak, osasun zentroa eta sortzaileak aurkitu ditzakegu bertan. Eragile gidaren ideia Gora Egia!-ren aurrekaria den “Bonifazio Egunon!” auzoko egitasmo komunikatiboak landu zuen bere garaian, guk ideia berreskuratu nahi izan dugu.

Guztira 54 eragile daude zerrendan une honetan baina hau abiapuntu bat besterik ez da, zerrenda irekia baitago eta edonork eragile berri bat gehitu dezake. Bestetik eragile batek bere fitxa sortuta dagoela ikusten badu eta aldaketak egin nahiko balitu aukera izango du, webgunean saioa hasita edukiz gero fitxaren jabetza eskatu dezake, egungo jabeak onartuz gero “Nire Eragileak” orrialdean kudeatu ahalko luke fitxa hori.

Egun aktibo daudenak eta ez daudenak bildu nahi ditugu bertan, gidak artxibo historiko gisa balio dezan. Eragile fitxa bakoitzak honako eremuak ditu argazkiak, bideoak, deskribapena, sorrera eta amaiera datak, kontakturako informazioa eta kokapen bat baino gehiago sartzeko aukera. Bilaketari dagokionean kategoria, eragile mota eta egoeraren arabera iragazi ahalko dira emaitzak. Espazio fisiko bat duten eragileen kasuan mapan ikusi ahalko dugu hauen kokapena.

Sortzaileentzako tokia ere badago gidan, musikari, idazle, margolariak… Auzoko kultura sortzaileak ezagutarazteko modua ere izan daitekeelakoan gaude.

Egiten dugun guztiarekin bezala ekarpenak eta iritziak gustora entzungo ditugu, iruzkin edo kontaktu atalaren bitartez.

Auzoko eragileei gonbidapena luzatzen dizuegu zuen fitxa sortzera eta jada existitzen bada zuen modura berritzera!